Kampuni inapoajiri wafanyakazi wapya huwapa mitihani mbalimbali. Huwaomba wawasilishe nyaraka zinazohitajika, wahudhurie mahojiano, au wafanye mtihani na kisha mahojiano.

Baadhi ya kampuni hutafuta tovuti na blogu za waombaji ili kufahamu tabia zao, hulka zao, mwenendo wao katika mahusiano na uwezo wao binafsi. Kila kampuni hujitahidi kuchagua watu wanaofaa zaidi kulingana na viwango ilivyoweka. Ndivyo ilivyo katika Ufalme wa Mungu.

Mungu anaweza kujibu maombi na kutoa baraka kulingana na viwango alivyoweka. Anataka watu wote wapokee majibu na kuishi maisha yenye baraka. Hata hivyo, majibu na baraka zake hutolewa kulingana na viwango vya haki yake. Kwa maneno mengine, mtu hupokea baraka anapoingia ndani ya mipaka ambayo Mungu ameweka kwa ajili ya baraka hizo.

Yule akida wa Kirumi katika Mathayo 8 alipokea jibu kutoka kwa Yesu kwa sababu alikuja ndani ya mipaka ya upendo na baraka za Mungu. Wakati huo Milki ya Roma ilikuwa imetawala Israeli, na mamlaka ya akida wa Kirumi ilikuwa kubwa sana. Akida mmoja wa Kapernaumu alimjia Yesu na kumwomba amponye mtumishi wake aliyekuwa amelala nyumbani amepooza na kuteseka sana. Haikuwa kawaida kwa mtu mwenye mamlaka makubwa kutoka katika nchi iliyotawala kwenda kwa mtu wa hali ya chini kutoka katika nchi iliyotawaliwa na kumwomba jambo.

Hili linaonyesha jinsi alivyokuwa mwema na mwenye huruma. Unyenyekevu wake ulimvutia Yesu, naye akamwambia, “Nitakuja nimponye.” Lakini akida akajibu kwa unyenyekevu na imani, “Bwana, sistahili wewe kuingia chini ya dari yangu; lakini sema neno tu, na mtumishi wangu atapona.” Yesu aliposikia hivyo, alistaajabu, akasema, “Amin, nawaambia, sijaona imani kubwa namna hii katika Israeli.

Nenda zako; na iwe kwako kama ulivyoamini.” Mtumishi wake akapona saa ileile. Kila kitu kiliwezekana kwa akida huyo kwa sababu alikuwa na imani kubwa namna hiyo. Pia alikuwa mnyenyekevu na mwenye huruma ya kutosha kuwajali watumishi wake.

Alistahili kabisa kupokea majibu ya Mungu. Kwa maelezo zaidi, tafadhali tembelea tovuti ya www.gcntv.org. Ninaomba kila mmoja wenu awe na upendo mkuu na wema kama ule wa akida huyo na amtukuze Mungu daima kwa baraka nyingi anazowapa. Ninaomba haya katika jina la Bwana wetu!

    His Emeritus Bishop Dr. Jaerock Lee