Ninaomba maisha yenu yajazwe upendo na baraka za Mungu. Sasa ningependa kushiriki nanyi neema kupitia ujumbe wenye kichwa “Kungoja Wakati Ufaao.”

Mwaka unapokaribia mwisho, watu huhesabu matokeo ya mwaka na kujiandaa kuupokea mwaka mpya wakiwa na azimio jipya. Ikiwa walijitahidi kwa bidii kutimiza matamanio ya mioyo yao, Mungu angewalipa kwa baraka. Hata kama matunda bado hayajaonekana, furaha na shukrani moyoni zitakuwa ushahidi wa matunda hayo.

Ufanye nini ili uvune matunda mengi zaidi katika mwaka mpya wenye matumaini? Kwanza, panda mbegu za imani na utafute Ufalme na haki ya Mungu. Yesu alisema katika Mathayo 6:33, “Utafuteni kwanza ufalme wake, na haki yake; na hayo yote mtazidishiwa.” Kwa hiyo, kila anayempenda Mungu atautafuta kwanza Ufalme na haki yake. Unapotenda hivyo, Mungu atazifanya nafsi zenu zifanikiwe, atafanya mambo yote yaende vizuri kwenu, kisha mtapokea baraka nyingi.

Pili, mkabidhi Mungu kila jambo. Mungu ndiye anayeturuhusu kuvuna matunda ya baraka katika maisha yetu, kwa hiyo unapaswa kumwachia kila kitu. Kinyume chake, usipomkabidhi Mungu mambo yako bali ukatangulia mbele yake, vikwazo visivyotarajiwa vinapotokea unaweza kupata shida na kuvunjika moyo unapofikia mipaka yako. Bila shaka, “kumkabidhi Mungu kila kitu” hakumaanishi kukaa tu na kutazama mambo yakiendelea.

Hupaswi kuamini na kuomba tu kwamba Mungu atalitimiza jambo hilo, bali unapaswa pia kutii anapokuongoza utende kama chombo chake. Unapolitii Neno la Mungu, kazi zake za ajabu zitatokea kwako hata katika mambo ambayo mawazo ya kibinadamu yanaona hayawezekani. Mwisho, vumilia hadi wakati wa mwisho ili uvune matunda mengi. Baada ya kupanda mbegu za maombi na matendo ya utii, unapaswa kungoja na kuvumilia kwa subira.

Unapoendelea kutenda matendo ya imani bila kubadilika katika hali yoyote, utapata majibu kwa yote uliyopanda kwa imani. Nini kitatokea mkulima akipanda mbegu kisha akachimba udongo kwa pupa kila siku? Kila mmea una wakati wake tofauti wa kuzaa matunda.

Vivyo hivyo, unapotimiza wajibu wako kwa uaminifu huku ukingojea wakati wa Mungu, atakuwezesha kuvuna matunda mengi zaidi wakati unaofaa kabisa. Kwa hiyo, ninaomba uelewe vizuri na kufahamu siri za kupokea baraka nyingi, na kupokea na kufurahia baraka za ajabu kiroho na kimwili. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee