Andiko: Wagalatia 6:7: “Msidanganyike, Mungu hadhihakiwi; kwa kuwa chochote apandacho mtu, ndicho atakachovuna.” Ninaomba maisha yenu yajazwe upendo na baraka za Mungu. Sasa ningependa kushiriki nanyi neema kupitia ujumbe huu wenye kichwa “Mafanikio Maishani.”

Katika Israeli, ambako Yesu alizaliwa na kufanya huduma yake, kuna Bahari ya Galilaya na Bahari ya Chumvi. Maji kutoka Mlima Hermoni hushuka na kuijaza Bahari ya Galilaya, kisha hutiririka kupitia Mto Yordani. Kwa sababu ya mtiririko huu, Bahari ya Galilaya hujaa uhai na nguvu daima, na samaki wengi huishi humo.

Kwa upande mwingine, maji yanapoingia katika Bahari ya Chumvi, iliyo mwisho wa Mto Yordani, bahari hiyo huwa na chumvi nyingi sana kwa sababu maji hayatoki humo. Chumvi yake ni nyingi mno hivi kwamba hakuna kiumbe hai kinachoweza kuishi ndani yake. Ndiyo maana inaitwa “Bahari ya Chumvi.”

Kinachoonekana kuizunguka bahari hiyo ni maeneo yenye matope. Tunaweza kuona kwamba kanuni hii ya asili inatumika pia katika maisha yetu. Kama Bahari ya Chumvi, watu wengi wanaotafuta kutosheleza tamaa zao wenyewe tu huonekana kuwa na maisha ya utajiri, lakini hatimaye hawafurahii utajiri huo kwa muda mrefu. Kinyume chake, mtu aliye kama Bahari ya Galilaya hufurahia kushiriki mambo mema na kuwafaidi wengine. Kwa njia hiyo, anaweza kuishi maisha yenye furaha na mafanikio huku akiwasaidia wengine wafanikiwe pia.

Kama Wagalatia 6:7 inavyosema, “Msidanganyike, Mungu hadhihakiwi; kwa kuwa chochote apandacho mtu, ndicho atakachovuna.” Hii ni sheria ya ulimwengu na haki ya Mungu: utavuna kama ulivyopanda. Unapolishika na kulitii Neno la Mungu kama mtoto wake, kupokea baraka ni jambo la kawaida na linalopatana na haki ya Mungu.

Abrahamu ni mfano wa jambo hilo. Kwa sababu alimpenda Mungu, hakutii amri zake bila kusita tu, bali pia aliwatendea wengine mema daima, alitafuta faida yao na alifurahia kuwahudumia wageni. Aliendelea kufanya hivyo maisha yake yote. Ndiyo maana Mungu alimpa Abrahamu baraka za aina mbalimbali kulingana na haki yake, zikiwemo afya njema, maisha marefu, watoto wengi na utajiri.

Ulikuwa mkubwa sana utajiri, umaarufu na heshima ya Abrahamu hivi kwamba wafalme wengi wa nchi jirani walimpa zawadi. Aliitwa “rafiki wa Mungu” na anajulikana kuwa “baba wa imani.” Kwa hiyo, ninaomba kila mmoja wenu apokee baraka za ajabu kama Abrahamu, kiroho na kimwili, kwa kumpenda Mungu na jirani yake kama nafsi yake; aishi maisha yenye mafanikio na amtukuze Mungu. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee