Andiko: 1 Wakorintho 9:24: “Hamjui ya kuwa wale washindanao kwa kupiga mbio, hupiga mbio wote, lakini apokeaye tuzo ni mmoja? Pigeni mbio namna hiyo, ili mpate.” Ninaomba maisha yenu yajazwe upendo na baraka za Mungu. 

Sasa ningependa kushiriki nanyi neema kupitia ujumbe wenye kichwa “Mashindano ya Imani.” Katika mashindano ya mbio, nafasi ya mkimbiaji wa kwanza na wa pili inaweza kutofautiana kwa sekunde moja au mbili tu, au kwa pointi moja au mbili. 

Ndiyo maana waamuzi hupanga kwa usahihi nafasi za washindani. Ndivyo ilivyo katika mashindano ya imani yetu. Mtume Paulo alisema katika 1 Wakorintho 9:24, “Hamjui ya kuwa wale washindanao kwa kupiga mbio, hupiga mbio wote, lakini apokeaye tuzo ni mmoja? Pigeni mbio namna hiyo, ili mpate.” Ni vigezo gani vinavyopima imani katika mashindano haya? Miaka ya imani, vyeo au nafasi, na wajibu haviamui mpangilio wa kiroho. Mambo hayo yanahusiana na thawabu utakazopokea mbinguni, lakini kipimo muhimu zaidi ni kiwango cha utakaso ulichofikia.

Jambo muhimu zaidi ni kiasi cha dhambi ulizoondoa, uzuri na usafi wa moyo ulioujenga, na jinsi ulivyomfanana Mungu mtakatifu na mkamilifu. Jambo la pili ni kuwa mwaminifu katika nyumba yote ya Mungu. Ni muhimu jinsi ulivyotimiza wajibu wako kwa uaminifu na moyo wa kujitoa. Kwa vigezo hivi viwili, imani ya kila mtu hupimwa kwa usahihi bila kosa lolote. 

Mpangilio wa kiroho wa wale waliolala katika Kristo tayari umeamuliwa, lakini sisi ambao bado tuko hai tunapaswa kujifunza matendo ya imani ya mababa wa imani na kuacha kumbukumbu bora zaidi za imani. Huenda baadhi yenu mkauliza kwa nini mpangilio wa kiroho utapimwa na kupewa kila mtu kivyake ilhali wote ni watoto wa Mungu mbinguni. Lakini ukiichunguza Biblia kwa makini, utaona kwamba katika ufalme wa mbinguni kuna viwango vya kiroho vilivyopangwa kwa uangalifu na kupewa kila mtu. 

Yesu alisema katika Mathayo 5:19, “Basi mtu yeyote atakayevunja amri mojawapo katika hizi zilizo ndogo, na kuwafundisha watu hivyo, ataitwa mdogo kabisa katika ufalme wa mbinguni; bali mtu atakayezitenda na kuzifundisha, huyo ataitwa mkubwa katika ufalme wa mbinguni.” Mtume Paulo alisema katika 1 Wakorintho 15:40–41 kwamba utukufu wa jua ni mwingine, wa mwezi ni mwingine, na wa nyota ni mwingine; nyota hutofautiana kwa utukufu, akisisitiza kwamba kila mtu atapokea utukufu tofauti mbinguni. 

Je, ingekuwa haki kama mtu aliyempokea Bwana muda mfupi kabla ya kufa na mtu aliyekuwa mwaminifu katika ufalme wa Mungu maisha yake yote kama mtume Paulo wangetendewa sawa mbinguni? Mungu humruhusu kila mtu avune alichopanda na hulipa kwa yale aliyomtendea. Ndiyo maana anasema katika Mithali 8:17, “Nawapenda wale wanipendao, na wale wanitafutao kwa bidii wataniona.” 

Kwa hiyo, ninaomba kila mmoja wenu autakase moyo wake na kutimiza kwa uaminifu wajibu wake wote, ili awe miongoni mwa walio wakuu katika ufalme wa mbinguni. Ninaomba katika jina la Bwana wetu Yesu Kristo!

    Askofu Mstaafu, Dkt. Jaerock Lee