“Ee jinsi ulivyo mkuu utajiri na hekima na maarifa ya Mungu! Hukumu zake hazichunguziki, wala njia zake hazitafutikani!” (Warumi 11:33). Ninaomba maisha yenu yajazwe upendo na baraka za Mungu.

Sasa ningependa kushiriki nanyi neema kupitia ujumbe wenye kichwa “Baraka ya Mabadiliko.” Tunakutana na mambo yasiyotarajiwa mara nyingi tunapoishi duniani. Haidhuru umepanga kwa kina kiasi gani au umejiandaa kikamilifu kadiri gani, unaweza kukumbana na matatizo yasiyotarajiwa.

Baadhi yenu hukata tamaa na kusalimu amri katikati ya safari, ilhali wengine hujitahidi kwa imani hadi mwisho kwa utukufu wa Mungu. Miaka kadhaa iliyopita nilifanya mkutano wa injili nchini Pakistan. Sheria ya taifa hilo inatambua uhuru wa dini, lakini kwa uhalisia Wakristo wanadhulumiwa. Watu wa dini zilizo wachache hupata shida nyingi kupata kazi na hushambuliwa kwa ukatili wanapogeukia Ukristo.

Ni vigumu kwao kupata msaada wa kisheria dhidi ya ukatili huo. Katika hali hiyo, Wakristo wengi wa Pakistan walihitaji nafasi ya kuimarisha imani, kujiamini na kupata ujasiri wa kumtangaza Yesu Kristo Mwokozi wetu kama makanisa ya kwanza yalivyofanya. Ndiyo maana Mungu aliniruhusu nifanye mkutano wa injili Pakistan, nionyeshe ushahidi unaoonekana wa Mungu aliye hai na kushuhudia kwamba Yesu Kristo ndiye Mwokozi wetu pekee.

Kamati iliyoandaa mkutano huo ilitangaza mkutano wa uponyaji kupitia vyombo mbalimbali vya habari, vikiwemo televisheni, magazeti ya kila siku, mabango, mabango ya vitambaa na vibao vya matangazo. Hata hivyo, mambo kadhaa yasiyotarajiwa yalitokea. Yalianza siku yenyewe tuliyopaswa kufanya mkutano wa uponyaji. Polisi walifunga lango la eneo la mkutano licha ya kuwa tulikuwa tumepata kibali kutoka kwa serikali ya Pakistan.

Waliwazuia Wapakistani kuingia eneo la mkutano. Waislamu wengi walikuwa wameipinga serikali na kuishinikiza ifute tukio hilo kwa kuogopa ugaidi. Katika hali hiyo ngumu, washiriki wote wa timu ya misheni ya Manmin walikiri imani yao. Mungu alifurahishwa sana, akamtuma waziri mkuu wa serikali ya Pakistan, na lango la eneo hilo likafunguliwa tena.

Waebrania 11:1 inasema, “Basi imani ni kuwa na hakika ya mambo yatarajiwayo, ni bayana ya mambo yasiyoonekana.” Kama Mungu asemavyo katika mstari huu, tukimpendeza kwa kuonyesha imani yetu, haidhuru tukikumbana na matatizo ya aina gani, atatupa baraka za ajabu zinazobadili hali yetu.

Kwa hiyo, uwe na imani inayomwezesha Mungu akuamini na kumpendeza katika hali zote, na umtukuze daima. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee