Ninaomba maisha yenu yajazwe upendo na baraka za Mungu. Ningependa kushiriki nanyi neema kupitia ujumbe wenye kichwa “Mwenendo Unaofaa Wakati wa Ibada.” Kwa kuangalia tu jinsi mtu anavyokula na mwenendo wake, tunaweza kutathmini jinsi afya yake ilivyo.

Mtu akimeng’enya vizuri chakula hata kama si kizuri, inaonyesha kwamba ana afya njema. Vivyo hivyo, tunaweza kutathmini jinsi maisha ya Kikristo ya mtu yalivyo kwa kuangalia tu mwenendo wake wakati wa ibada. Mtu anayepokea neema kupitia mahubiri na kubadilika anaonyesha kwamba ana afya njema kiroho.

Hii ni kwa sababu ibada ndiyo kilele cha maisha yetu ya Kikristo. Basi, sisi waumini tunapaswa kumtolea Mungu ibada kwa namna gani ili kumpendeza? Mimi mwenyewe, Siku ya Bwana asubuhi na mapema nilikuwa naoga kwa heshima, kuvaa nguo za ndani na soksi zilizofuliwa vizuri, kisha kuvaa mavazi yangu ya nje yaliyo safi zaidi. Nimeendelea kushikilia mwenendo huu tangu nilipoanza maisha ya Kikristo hadi sasa.

Pia, nilikuwa nikifika kanisani kwa wakati kabla ibada haijaanza. Hata mtumishi mchanga wa Bwana alipohubiri, nilisikiliza mahubiri kwa moyo mnyenyekevu kana kwamba nimesimama mbele za Mungu. Niliimba sifa kwa moyo wangu wote na kwa shukrani, nikijifunza maana za kiroho zilizomo katika maneno yake, na niliandaa sadaka kwa kila ibada, iwe kubwa au ndogo; sikuhudhuria ibada mikono mitupu kamwe.

Sadaka nilizotayarisha zilikuwa safi daima, na hata nilipohitaji fedha haraka kwa matumizi yangu binafsi, sikuwahi kutumia fedha nilizokuwa nimeweka kwa ajili ya sadaka. Sisemi haya ili nijisifu. Nawaeleza ili kuonyesha kwamba ukiwa na moyo wa kumcha Mungu, utampa kila kitu kutoka moyoni—mkao wako, wakati wako, mavazi yako na sadaka yako. Bila shaka, Mungu hupendezwa zaidi na ibada uliyoiandaa kutoka moyoni kuliko ibada ambayo hujaiandaa wala kuiheshimu.

Hata hivyo, baadhi ya watu huja ibadani na kujenga ukuta kati yao na Mungu. Kwa mfano, hugombana na wengine ndani ya patakatifu, huzungumza mambo ya dunia, husinzia au kuzungumza na mtu aliye karibu nao wakati wa ibada. Hutuma ujumbe kwa simu, hula vitafunio na kunywa vinywaji. Zaidi ya hayo, huwa wamezoea kuchelewa kanisani au hukimbia kwa haraka ili wafike kwa wakati, ilhali wangeweza kujiandaa dakika kumi mapema kama hawana sababu maalumu. Pia huondoka kwenye viti vyao kabla ya baraka ya mwisho au Sala ya Bwana kwa sababu ya shughuli zao binafsi.

Mungu anawezaje kupendezwa na mwenendo huo? Kwa kweli, wanamvunjia heshima na kumdharau. Hata duniani, unapokutana na mtu aliye juu yako, huandaa mavazi yako, mawazo yako na mkao wako kwa uangalifu mkubwa. Basi, mwenendo wetu unapaswa kuwa kamili mbele za Mungu Muumba, anayestahili sifa na utukufu kutoka kwa wanadamu. Mungu hutazama jinsi tunavyojiandaa kwa ibada, jinsi tunavyotamani kusikiliza Neno lake na jinsi tunavyomsifu kwa moyo unaompenda.

Hupokea harufu ya mioyo yetu ya ndani na kutupa baraka. Ninaomba ithamini ibada na umtolee Mungu harufu ya moyo wako wote na nia yako yote. Unapofanya hivyo, ninaomba katika jina la Bwana kwamba Mungu apendezwe na harufu hiyo, akubariki na kusema, “Nikutendee nini?”

    His Emeritus Bishop Dr. Jaerock Lee