Ninaomba maisha yenu yajazwe upendo na baraka za Mungu. Sasa ningependa kushiriki nanyi neema kupitia ujumbe wenye kichwa “Tunda.”

Kila mkulima hutazamia na kutumaini kuvuna matunda mengi anapofanya kazi yake. Haidhuru anafanya kazi katika shamba la aina gani, kila mtu hupanda na kuwekeza kwa matumaini ya kuvuna matunda. Ndivyo ilivyo katika Bwana. Kulingana na kanuni ya Mungu isemayo, “Mungu huturuhusu tuvune tulichopanda na kutulipa kulingana na tulivyotenda,” imani yetu hudhihirishwa na kutambuliwa kupitia matunda yake.

Jambo muhimu zaidi katika kuzaa matunda mema ni aina ya mti. Mti mwema huzaa matunda mengi na mazuri unapopata virutubisho vizuri. Lakini mti mbaya huzaa matunda mabaya kwa sababu haupati virutubisho vizuri. Ufanye nini ili uwe tunda zuri mbele za Mungu? Kwanza, unapaswa kuzaa tunda lenye ladha moja tu.

Siku hizi baadhi ya miti huzaa matunda yenye ladha mbili au zaidi kwa kutumia uhandisi wa vinasaba. Lakini kwa kawaida mti huzaa tunda lenye ladha moja. Ndivyo ilivyo kirohoni. Ikiwa umefundishwa na mchungaji wako anayemfuata Bwana, unapaswa kutoa ladha ileile anayotoa mchungaji wako.

Kwa maneno mengine, watu wanaokuzunguka wanapaswa kuutambua moyo wa Mungu Baba na wa Bwana ndani yako. Pili, ili uwe tunda zuri mbele za Mungu, unapaswa kujaza utu wako wa ndani kwa kweli. Matunda yanayoonekana mazuri kwa nje lakini hayajaiva au yameharibika kwa minyoo hutupwa au kutumiwa tu kuwa chakula cha mifugo.

Kiroho, matunda yenye nyama nzuri ni watu walioondoa kila aina ya uovu na kutakaswa. Zaidi ya hayo, wanapoujaza moyo wao kikamilifu kwa kweli, wanaweza kuwa watu wa roho kamili na kutambuliwa na Mungu kuwa matunda makamilifu ya kiroho. Tatu, ili kuzaa matunda mazuri, unapaswa kuyazaa wakati Bwana anapotaka kuvuna. Wakati wa mavuno ukifika, usipozaa matunda au ukiwa bado unajiandaa tu kuzaa, hutakuwa na faida kwa Bwana. Vivyo hivyo, unapaswa kuzaa matunda kwa wakati unaofaa machoni pa Mungu. Hii inamaanisha kuelewa anachotaka na kuwa tunda katika shamba linalohitajika zaidi.

Unapokabidhiwa kazi inayohitajika sana, unapaswa kuzaa matunda mengi, kumtukuza Mungu na kupanua Ufalme wake. Kwa hiyo, mshukuru Mungu kwa kukulinda daima na kukujaza neema yake; uwe tunda zuri analolitaka, ili uwe furaha na taji ya shangwe kwake. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee