Ninaomba maisha yenu yajazwe upendo na baraka za Mungu. Leo ningependa kushiriki nanyi neema kupitia ujumbe wenye kichwa “Moyo Usioyumba.” Mwanzoni mwa mwaka watu hupanga mambo mengi kama, “Mwaka huu nitajaribu kuamka mapema zaidi.” “Nitakariri mstari mmoja wa Biblia kila siku.”

“Nitaomba bila kukoma.” “Mwaka huu nitafanya mazoezi.” Hata hivyo, baada ya siku chache, wengi wao huvunja ahadi walizojitolea na, kwa sababu mbalimbali, huacha kwa urahisi mipango yao mikubwa. Basi, kwa nini hubadilisha mioyo yao kuhusu mambo waliyoazimia kufanya, na kwa nini moyo wao wa kwanza hubadilika?

Ni kwa sababu mioyoni mwao kuna hila na ujanja unaowafanya wabadilike kulingana na hali zenye faida kwao. Watu wengi wanaoishi katika ulimwengu huu wa mwili hutafuta faida yao wenyewe, kwa hiyo hubadilisha nia zao hata kama wamefanya azimio thabiti, jambo lisipowanufaisha. Watu hubadilisha nia zao kwa viwango tofauti kulingana na ujanja ulio ndani yao. Baadhi hubadilika kwa sababu ya tamaa, mamlaka na heshima.

Zaidi ya hayo, baadhi ya watu hubadilisha mipango yao ya awali mara kwa mara hali zao zinapobadilika. Basi, tufanye nini ili tuwe na moyo usioyumba? Jenga moyo wa kweli usio na uongo. Waebrania 10:22 inasema, “Na tukaribie wenye moyo wa kweli, katika utimilifu wa imani, hali tumenyunyiziwa mioyo tuache dhamiri mbaya, tumeoshwa miili kwa maji safi.”

Ukijiepusha na kila aina ya uovu na mambo yote yasiyo ya kweli, unaweza kuwa na moyo wa kweli na hivyo kuwa na imani kamili. Ili kujenga moyo wa kweli, unapaswa kulitii Neno la Mungu kikamilifu. Fanya mambo ambayo Mungu anatuambia tufanye, tupa mbali anayotuambia tuache, shika anayotuambia tushike na usifanye anayotuambia tusifanye. Huenda ukakutana na mambo mengi usiyoweza kuyaelewa kwa kutumia hekima na maarifa ya dunia.

Ukilalamika au kutotii katika mawazo yako kwa sababu ya maarifa na uzoefu wako, hutaweza kuwa na moyo wa kweli. Hata kama jambo linaonekana kuwa sahihi kwako, lisipopatana na mapenzi ya Mungu unapaswa kuliacha na kutii mapenzi yake. Bila shaka, huenda isiwe rahisi kwa baadhi ya waumini kumtii kikamilifu tangu mwanzo. Wengine wanaweza kung’ang’ania mawazo na maoni yao na kuwa na mgogoro wa ndani jambo lisipowaonekana kuwa na faida.

Lakini wanapoendelea kujitahidi kutii kutoka moyoni, kujihesabia haki na mitazamo yao iliyojengeka itabomolewa, na hatimaye watalitii Neno la Mungu kikamilifu. Mungu huutazama moyo wao wa kutaka kumtii na matendo yao ya utii; kisha huubadilisha moyo wao kwa kweli na kuwapa imani ya kiroho.

Hapo mambo yote yatawaendea vizuri na watajazwa baraka. Mithali 4:23 inasema, “Linda moyo wako kuliko yote uyalindayo; maana ndiko zitokako chemchemi za uzima.” Ninaomba katika jina la Bwana Yesu Kristo mjenge moyo wa kweli usioyumba na kwa moyo huo mtimize kila jambo mlilopanga na kutamani.

    His Emeritus Bishop Dr. Jaerock Lee