Ninaomba maisha yenu yajazwe baraka na upendo wa Mungu. Sasa ningependa kushiriki nanyi neema ya Bwana kupitia ujumbe wenye kichwa “Siri ya Kuwa na Amani na Kila Mtu.”

Niwasimulie hadithi ya wanandoa wazee. Siku moja waligombana, mke akakasirika na kunyamaza. Wakati wa chakula cha jioni, alimwandalia mumewe meza, kisha akageuka na kuanza kushona kitambaa kwenye kona ya chumba. Mzee huyo alitamani kula naye na kuzungumza naye kwa upendo, lakini alihuzunika kwa sababu mkewe hakusema neno lolote.

Ghafla mume akasimama na kuanza kutafuta kitu, akifungua droo na makabati. Alitafuta huku na huku chumbani. Mwanzoni mke alijifanya hajali alichokuwa akifanya, lakini alipomwona akitoa kila kitu kabatini, zikiwemo nguo na vifaa mbalimbali, hakuweza tena kuzuia udadisi wake na kumuuliza, “Unatafuta nini?” Mume alimtazama na kutabasamu, kisha akasema, “Sasa nimekipata! Sauti yako!” Kuishi kwa amani na wengine ni rahisi sana.

Sababu kuu inayowafanya watu wengi washindwe kuwa na amani na wengine ni kung’ang’ania kwamba wao ndio wako sahihi. Neno la kweli la Mungu hutusihi tusamehe, tuwapende adui zetu na kuwatumikia wengine. Lakini watu hushindwa kuishi kwa amani kwa sababu hawatii Neno la Mungu na badala yake husisitiza mawazo yao wenyewe. Usipong’ang’ania mapenzi yako na kujihesabia haki, bali ukifuata Neno la Mungu, unaweza kuishi kwa amani na mtu yeyote popote ulipo.

Hasa, nyumbani panapaswa kujawa upendo na amani. Mungu anataka tufanye nyumba zetu ziwe na amani. Ndiyo maana anawaamuru watoto wawatii wazazi wao, wenzi wa ndoa wapendane na ndugu wawe wema wao kwa wao. Mkinyenyekea na kumjali mwingine, hisia za kuumizwa na mkanganyiko wa moyoni vinaweza kutatuliwa kwa urahisi.

Hata hivyo, wengi wenu hupata shida kujinyenyekeza kwa sababu nafsi zenu bado zinatawala. Mambo madogo husababisha kutokuelewana na matatizo, na kiburi kisicho cha lazima hupanua pengo la hisia mbaya. Ukijishusha na kuwatumikia wengine kama Neno la Mungu linavyofundisha, unaweza kurejesha amani upesi.

Kwa mtazamo wa mwili, unaweza kuumia kwa kiburi unapojaribu kumfikia mwingine kwanza na kujishusha; lakini hilo linaonyesha kwamba wewe ni mtu mwenye moyo mkubwa. Ninaomba utambue kwamba kadiri unavyoifia nafsi yako kwa kufuata Neno la kweli la Mungu, ndivyo utakavyoweza kuishi maisha yenye furaha na amani na kila mtu, na maisha yako yatajaa furaha. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee