Ninaomba mjazwe upendo na baraka za Mungu, na ningependa kushiriki nanyi neema kupitia ujumbe wenye kichwa “Watenda Kazi Pamoja Katika Imani.” Wakati wa Vita vya Pili vya Dunia, siku moja jua lilipokuwa kali sana, kikosi kimoja cha jeshi la Uingereza kilichokuwa katikati ya uwanja kilizungukwa na maadui. Kitu pekee ambacho kingezima kiu yao kilikuwa chupa ya maji. Maji yaliyokuwa ndani ya chupa hayakutosha hata kidogo kwa askari wote.

Hata hivyo, kwa kushangaza, baada ya askari wote kupata nafasi ya kunywa, zaidi ya nusu ya chupa ilikuwa bado imejaa maji. Kila askari alifikiria kwamba mwenzake angefuata kunywa, kwa hiyo alilowesha midomo yake tu. Wote walijali hali ya wenzao, hivyo waliweza kupata nguvu na kuishi hadi askari wa msaada walipofika. Vivyo hivyo, sisi waumini ni watenda kazi pamoja, tunaosaidiana hadi tushinde vita vya kiroho kwa ajili ya Ufalme wa Mungu. Tunapoungana kwa upendo, adui Ibilisi na Shetani hawawezi kuzuia huduma zetu, nasi tunaweza kuwaongoza watu wengi kwenye njia ya wokovu. Basi, tufanye nini ili tuungane kwa upendo?

Kwanza, tuangalie hali za wengine na kuwajali.

Miongoni mwetu kuna waumini wanaokimbia mashindano ya imani wakiwa wamejazwa Roho Mtakatifu, na wengine ambao wamechoka na kudhoofika na wana imani vuguvugu. Tukiwanyooshea mkono na kuwatia moyo waliolegea, watapata nguvu kupitia kwetu. Kwa hiyo, ni muhimu kutamani kuwatazama watu wanaotuzunguka na kuwatia moyo ili hakuna anayepungukiwa. Tukiona ndugu au dada katika Kristo hafanyi vizuri na anaelekea kurudi duniani, tusitazame tu; tumtie nguvu na moyo ili ashiriki katika mkondo wa kiroho.

Pili, tusaidiane kujazia mapungufu yetu.

1 Wakorintho 12:21 inasema, “Jicho haliwezi kuuambia mkono, Sina haja na wewe; wala tena kichwa hakiwezi kuiambia miguu, Sina haja na ninyi.” Sisi waumini wote ni watenda kazi pamoja katika imani katika Bwana na viungo vya mwili mmoja. Kwa hiyo, hakuna kiungo kisicho na umuhimu; kila kiungo kinahitaji kuwepo kwa ajili ya vingine. Tunapojazia mapungufu ya kila mmoja kwa vipawa vyetu na kushirikiana, kanisa, mwili wa Bwana, litajengwa na kuangaza nuru.

Kwa mfano, ndugu katika Kristo akikosea na kumvunjia Mungu heshima, usimhukumu; badala yake, omba apate nguvu, na ujute kwa sababu hukuweza kumsaidia. Zaidi ya hayo, ikiwa kuna jambo ambalo hakulifikiria, unaweza kumweleza na kumsaidia kutimiza wajibu wake. Huo ndio moyo wa Ufalme wa Mungu. Kwa hiyo, ninaomba katika jina la Bwana muwe watenda kazi pamoja katika imani, muungane moyoni, mjaziane mapungufu na kubebana mizigo.

    His Emeritus Bishop Dr. Jaerock Lee