Andiko: Warumi 12:21: “Usishindwe na ubaya, bali uushinde ubaya kwa wema.” Ninaomba maisha yenu yajazwe upendo na baraka za Mungu.

Sasa ningependa kushiriki nanyi neema kupitia ujumbe wenye kichwa “Wema Mkamilifu.” Watu wengi hudhani kwamba ni wajibu wa mtu na haki kulipiza kisasi kwa wale wanaowasingizia bila haki au kuwasababishia matatizo bila sababu. Lakini Mungu hutuambia tuwapende adui zetu na kutufundisha kwamba kusamehe ni sehemu ya wema.

Kwa hiyo, wema unaoonekana machoni pa wanadamu ni tofauti kabisa na wema wa Mungu. Ufanye nini ili umfanane Mungu, ambaye ndiye wema wenyewe, na kuufikia wema mkamilifu? Zaidi ya yote, ni muhimu kusikiliza na kujifunza Neno la Mungu kwa bidii na kulitenda.

Sasa tuangalie jinsi ya kufikia wema mkamilifu. Kiwango cha chini kabisa cha wema ni kuzuia hisia zako. Katika kiwango hiki, bado hujaondoa hisia zote mbaya, zikiwemo chuki na hasira ya haraka, bali unazizuia tu. Kwa hiyo, hata kama hujagombana na mwingine kwa uovu, huwezi kuonekana mwema machoni pa Mungu.

Ni afadhali kuzuia hisia mbaya kuliko kugombana na mwingine, lakini jambo linalohitaji kuzuiwa linaonyesha kwamba bado una uovu moyoni. Ukiendelea kuondoa dhambi na uovu kwa bidii na kupita kiwango hiki, utafikia kiwango cha juu zaidi ambamo huna tena hisia mbaya. Kwa kuwa huna tena chuki, kero wala hisia nyingine mbaya, unafikia kiwango cha chini kabisa cha wema wa kiroho unaotambuliwa na Mungu.

Jambo muhimu zaidi katika kiwango hiki ni kwamba hisia zako zinapochochewa, udhibiti mawazo yako bila kukata tamaa na umtendee na kumwelewa mwingine kwa wema. Ukifika kiwango cha juu zaidi cha wema kwa njia hiyo, hakuna uovu wa aina yoyote ambao mwingine anaweza kukutendea utakaokuchochea kuwa na hisia mbaya.

Katika kiwango cha juu zaidi kidogo cha wema, mwingine anapokutendea uovu, utaweza kuugusa moyo wake kwa matendo mema. Hapo hutahesabu faida yako mwenyewe wala kuona ni mzigo kujitoa na kuteseka kwa ajili ya mwingine, kwa sababu unafurahi na kushangilia kutenda mema. Ukiendelea kukuza kiwango chako cha wema, utafikia kiwango cha juu kabisa na kuwa na wema mkamilifu.

Ukiwa na wema huo mkamilifu, unaweza hata kuyatoa maisha yako kwa ajili ya mtu anayekutendea uovu. Hiki ndicho kiwango cha wema mkamilifu wa Mungu na Bwana. Bwana wetu Yesu alibeba msalaba na kuvumilia kusulubiwa kwa furaha ili kutukomboa kutoka katika dhambi zetu.

Ninaomba kila mmoja wenu autafakari upendo huu wa Bwana Yesu, aishi kulingana na Neno la Mungu na afikie kiwango cha juu kabisa cha wema kwa kujenga wema mkamilifu, ili akae katika upendo wa Mungu na kurithi mji mtakatifu wa Yerusalemu Mpya, Ufalme mzuri zaidi wa Mbinguni. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee