Ninaomba maisha yenu yajazwe upendo na baraka za Mungu, na ningependa kushiriki nanyi neema kupitia ujumbe wenye kichwa “Watumishi Wasiofaa.” Watu hutamani kutambuliwa kwa kazi na mafanikio yao. Hii ni kwa sababu hupata hisia ya thamani wanaposifiwa na kutambuliwa kwa mambo makubwa au madogo waliyofanya.

Tuseme umefanya kazi kwa bidii usiku kucha na kulipia gharama za kazi mwenyewe, lakini hukupokea malipo wala kutambuliwa. Je, unaweza kusema bila kujisikia vibaya au kuhuzunika, “Mimi ni mtumishi asiye na faida; nimefanya tu wajibu wangu”? Ili kuwa na moyo wa mtumishi asiye na faida, hupaswi kuwa na tamaa za ubinafsi. Ukiwa na tamaa hiyo, tamaa za mwili na uchoyo vitachochewa ndani yako, nawe utajaribu kutimiza mapenzi yako mwenyewe badala ya ya Mungu.

Kisha, bila kufikiri utajaribu kutimiza mambo yanayokufaidi wewe, familia yako na watu wanaokuzunguka, badala ya kutafuta kupanua Ufalme wa Mungu. Hasa, ubinafsi ukiwa ndani yako, kiburi kitaanza kuchipuka wakati fulani. Mwanzoni mwa maisha yako ya Kikristo huenda ulikuwa mnyenyekevu na kumtukuza Mungu, lakini sasa unaweza kutafuta utukufu wako mwenyewe na kufurahia heshima ambayo ilipaswa kumtolewa Mungu.

Si rahisi kugundua ubinafsi na kiburi kwa sababu vimejificha ndani kabisa ya moyo. Ikiwa kila mmoja wetu atafikiria daima neema ya Bwana, aliyewahurumia wenye dhambi waliostahili kufa na kumwaga damu yake ya ukombozi msalabani ili kutuokoa, hakuna atakayejisifu kwa yale aliyoyafanya, haidhuru amefanikisha mambo mangapi.

Mtu hawezi kujiinua juu ya wengine anapofikiria neema ya Mungu, aliyempa nguvu za kutupa dhambi, kumwezesha kuelewa Neno lake na kumwongoza apitie ulimwengu wa kiroho. Anachoweza na anachopaswa kufanya tu ni kumshukuru Bwana kwa neema yake na upendo wa Mungu, na kutoa huduma nyingi zaidi za uaminifu kwa Ufalme wa Mungu. Mithali 16:18 inasema, “Kiburi hutangulia uangamivu; na roho yenye majivuno hutangulia maanguko.”

Ukijitafutia utukufu wako mwenyewe baada ya kuzaa matunda mengi kwa kudhihirisha nguvu za Mungu kupitia maombi ya bidii, ina maana kwamba tayari umeanza kujitenga na Mungu. Baadhi ya waumini waliwahi kuwa vyombo vya thamani vilivyomtukuza Mungu, lakini baadaye Mungu akawaacha kwa sababu walichafuliwa na ubinafsi na kiburi. Wengine hupoteza upendo wao wa kwanza na kuwa na imani vuguvugu kwa sababu walitafuta amani na starehe za mwili.

Wengine tena huja kuufunika utukufu wa Mungu kwa sababu walitamani fedha na heshima. Kwa hiyo, ninaomba katika jina la Bwana mjinyenyekeze zaidi na zaidi mbele za Bwana wetu, aliyetoa maisha yake kwa hiari kwa ajili yetu, na mkiri kutoka ndani ya mioyo yenu, “Mimi ni mtumishi asiye na faida; nimetenda tu yale niliyopaswa kufanya.”

    His Emeritus Bishop Dr. Jaerock Lee