Ninaomba maisha yako yajazwe upendo na baraka za Mungu. Ningependa kushiriki nawe neema kupitia ujumbe wenye kichwa “Kujichunguza Kiroho.” Baadhi ya watu huenda hospitalini kufanyiwa uchunguzi wanapokuwa na tatizo la mwili, ilhali wengine hujichunguza wenyewe.

Ndivyo ilivyo pia katika hali yako ya kiroho. Unaweza kujua kama maisha yako ya Kikristo yanaendelea vizuri kupitia ushauri wa wengine, lakini unaweza pia kujichunguza mwenyewe kwa kutumia Neno la Mungu. Basi, utajuaje kiroho kama imani yako inakua au imedumaa?

Kwanza, chunguza kama una furaha ya kweli moyoni.

Maisha yako ya Kikristo yanapoendelea vizuri, utajawa furaha ya kiroho. Hii ni kwa sababu una tumaini kwamba utabadilika upesi na kwenda Yerusalemu Mpya. Wenye imani na tumaini la Mbinguni huwa na furaha daima, haidhuru hali zao ziweje. Hata hivyo, ikiwa huna furaha moyoni licha ya kuabudu, kuomba na kutimiza wajibu uliopewa na Mungu, unapaswa kutambua kwamba kuna tatizo. Ulipokutana na Bwana mara ya kwanza na upendo wako kwake ulipowaka, huenda ulifurahia kila jambo ulilofanya. Lakini wakati fulani uliacha kufurahi na ukaanza kufanya mambo kwa mazoea mbele za Mungu kwa sababu imani yako haikukua na ikadumaa.

Pili, chunguza kama una huzuni ya kiroho.

Wale wanaotamani mambo ya kiroho, kuomba bila kukoma na kuendelea kurekebisha mapungufu yoyote wanayogundua hawapotezi utimilifu wa Roho Mtakatifu. Hata hivyo, baadhi ya watu huonekana waaminifu kwa nje lakini wanapitia magumu ya kiroho ndani yao.

Kwa nini wanaonekana kukimbia mashindano ya imani lakini wanateseka? Ni kwa sababu wameacha kutahiri mioyo yao au wanaifanya polepole sana. Zamani walipogombana na mtu, walijilaumu kwa kila jambo na kuomba waondolewe dhambi zao. Lakini sasa wanafikiri wana maarifa ya Neno na kiwango cha juu cha imani, kwa hiyo husema, “Nimetenda vizuri; ni kosa la yule mwingine,” na kumlaumu mwingine. Hii ina maana kwamba imani yao haiendelei kukua. Unapolisikiliza Neno la Mungu na kujitahidi kuondoa dhambi zako, unatenda vizuri.

Hata hivyo, ukirudia hali hiyo kwa miaka mitatu, mitano au kumi na bado ukaonyesha dhambi na uovu kama chuki na hukumu, inaonyesha kwamba imani yako imeacha kukua. Je, unajaribu kuondoa mambo yasiyo ya kweli lakini huishia kushindwa? Au hujui kwamba kuna jambo unalopaswa kutupa? Ninaomba katika jina la Bwana mjitazame daima na kubadilika kuwa watu wa kiroho mnapofuata mkondo wa Roho.

    His Emeritus Bishop Dr. Jaerock Lee