Ninaomba maisha yenu yajazwe upendo na baraka za Mungu, na ningependa kushiriki nanyi neema kupitia ujumbe wenye kichwa “Wanaotamani Hekalu la Mungu.” Hekalu la Mungu ndilo mahali anapokaa Mungu, mahali patakatifu ambapo waumini humtolea sifa na shukrani zenye harufu nzuri.

Furaha ya kuwasiliana na Mungu katika patakatifu haiwezi kulinganishwa na furaha yoyote ya dunia hii. Kwa hiyo, mtunga-zaburi alikiri, “Maana siku moja katika nyua zako ni bora kuliko siku elfu kwingineko.” Biblia inasema kwamba wale waliotamani patakatifu pa Mungu walipata kibali na kupokea baraka kutoka kwake. Basi, tunapaswa kuwa na moyo na matendo ya aina gani ili tuwe miongoni mwa wanaotamani patakatifu pa Mungu?

Kwanza, tunapaswa kuthamini kila kitu kilicho cha Mungu.

Katika Yohana sura ya 2 kuna sehemu Yesu alipovipindua viti vya wabadili fedha hekaluni na kuwafukuza ng’ombe, kondoo na njiwa waliokuwa wakiuzwa. Yesu alionyesha hasira yake ili kutufundisha kwamba hekalu la Mungu ndilo mahali patakatifu na safi zaidi. Kwa hiyo, tunapaswa kulichukulia hekalu la Mungu kama nyumba yetu wenyewe na kulikagua daima ili libaki safi.

Ndivyo ilivyo pia kwa kila kitu kilicho cha hekalu la Mungu. Hatupaswi kupuuza kitu chochote kilicho cha hekalu kwa sababu tu si chetu au hatuna jukumu nacho. Tunapaswa kuvitunza vitu vyote vilivyowekwa wakfu kwa Mungu kwa uangalifu na kujali.

Pili, tunapaswa kuona hata wajibu mdogo zaidi ambao Mungu ametupa kuwa wa thamani na kuutimiza kwa mioyo yetu yote.

Wanaotamani kukaa katika hekalu la Mungu hufurahi hata wanapokabidhiwa kuwa walinda mlango wa patakatifu. Kwa sababu hiyo, wafanyakazi wa muda wote katika kanisa langu hushukuru sana kumfanyia Mungu kazi hekaluni mwake, hata kwa kusafisha hekalu. Tunapotambua upendo na neema ya Mungu na kumpenda, tutatimiza kwa kujitoa wajibu aliotupa, hata kwa uhai wetu, hata kama wajibu huo ni kulinda mlango.

Tatu na mwisho, tunapaswa kuwapenda ndugu na dada zetu katika Kristo kama nafsi zetu.

Waumini wanaolipenda hekalu la Mungu wanapaswa kulipenda kanisa na pia ndugu na dada zao katika Kristo, ambao ni viungo vya kanisa, mwili wa Bwana. Yesu alisema katika Mathayo 25:40, “Kadiri mlivyomtendea mmojawapo wa hao ndugu zangu walio wadogo, mlinitendea mimi.” Tunapowapa chakula ndugu zetu katika Kristo walio na njaa, au kuwavisha wale walio uchi, Bwana anasema tumemtendea yeye.

Mungu atafurahi na kutubariki tunapowatunza na kuwatumikia ndugu na dada zetu katika Kristo kama tunavyomtumikia Bwana. Mungu hukaa hekaluni mwake na hutazama daima. Kwa hiyo, ninaomba daima mioyo yenu, midomo yenu na matendo yenu viwe vitakatifu. Ninaomba haya katika jina la Bwana wetu!

    His Emeritus Bishop Dr. Jaerock Lee