Andiko: Wagalatia 6:9: “Tena tusichoke katika kutenda mema; maana tutavuna kwa wakati wake, tusipozimia roho.” Ninaomba maisha yenu yajazwe upendo na baraka za Mungu.

Sasa ningependa kushiriki nanyi neema kupitia ujumbe wenye kichwa “Tunda la Upendo.” Sikukuu fulani za kitamaduni zinapofika, familia nzima hukusanyika na kufurahi pamoja. Tuseme wewe ni Mkristo unayempenda Mungu na unakutana na familia yako baada ya muda mrefu. Huenda ukatamani washiriki wote wa familia yako wampokee Yesu Kristo na kumwamini Mungu.

Ni jambo bora zaidi familia nzima ikimwamini Yesu Kristo na kukimbia mashindano ya imani kwa tumaini la mbinguni. Lakini utafanya nini ikiwa baadhi ya watu wa familia yako bado hawajaokoka? Katika Wagalatia 6:9 Mungu anasema, “Tena tusichoke katika kutenda mema; maana tutavuna kwa wakati wake, tusipozimia roho.”

Kwa hiyo, usikate tamaa, bali amini kwamba bila shaka utavuna matunda ya uinjilisti wako kwa wakati ufaao. Zaidi ya hayo, kama wazazi wanavyojitoa na kujitolea kwa ajili ya watoto wao kwa sababu ya upendo, nawe unapaswa kuonyesha upendo kwa nafsi na kufanya kila jambo kwa upendo usiobadilika. Kisha Mungu atawatendea kazi, nao watakuwa maskini wa roho na kufungua mioyo yao, au watakuwa na ndoto na uzoefu wa kiroho.

Mungu Mwenyezi anaweza kumtendea kila mtu kazi kulingana na moyo na hali yake kwa hekima na nguvu za ajabu zinazopita mawazo ya wanadamu. Kwa hiyo, ukifanya kila jambo kwa upendo ili kuwaongoza nafsi nyingi kadiri iwezekanavyo kwenye njia ya wokovu, utavuna wakati utakapofika. Huenda ukapata huzuni zisizoelezeka ambazo huwezi kumweleza mtu yeyote, na kuteseka kwa kusalitiwa na mtu uliyempenda. Katika hali hiyo, usikate tamaa; endelea kufanya kila jambo kwa upendo usiobadilika na subira, nawe bila shaka utavuna matunda mazuri.

Ili kuvuna matunda ya uinjilisti ni lazima ushinde dhoruba, upepo mkali na jua kali; ukishindwa navyo, hutaweza kuzaa matunda. Ninaomba uamini na kutazamia kwamba wale unaowahubiria watakuwa watoto wa Mungu na kukushukuru mbinguni milele, na kwamba utahubiri Injili wakati unaofaa na usiofaa.

Kwa hiyo, panda mbegu ya Injili mioyoni mwa familia na marafiki zako, na uwalee kwa upendo wa kweli, ili uvune matunda mazuri na mengi. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee