Andiko: 1 Wakorintho 2:10: “Lakini Mungu ametufunulia sisi kwa Roho. Maana Roho huchunguza yote, hata mafumbo ya Mungu.” Ninaomba maisha yenu yajazwe upendo na baraka za Mungu.

Leo ningependa kushiriki nanyi neema ya Mungu kupitia ujumbe huu wenye kichwa “Mwongozo Katika Maisha Yako.” Ukilazimika kujiandalia na kupanga kila kitu mwenyewe kwa safari yako ya kwanza ya ng’ambo, huenda ukajihisi huna msaada. Taratibu za kupata tiketi kwenye uwanja wa ndege ni ngeni kwako. Kuwasiliana kwa lugha za kigeni na kutafuta njia pia si rahisi.

Hakika, hakuna jambo lililo rahisi. Lakini ukisafiri na mwongozo wa eneo hilo mwenye uzoefu na anayejua hali za mahali hapo vizuri, unaweza kufurahia safari yako kwa utulivu. Vivyo hivyo, ingekuwa jambo zuri kama mwongozo stadi angeandamana nawe katika safari ya maisha na kuifanya iwe salama na yenye furaha! Mungu wetu wa upendo huwapa zawadi ya Roho Mtakatifu wale wanaompokea Yesu Kristo, ili Roho huyo awe Mwongozo wetu katika safari ya maisha. Kwa hiyo, mtu yeyote anayesikia wazi Roho Mtakatifu, kupokea mwongozo wake na kumtii anaweza kufanikiwa katika kila jambo analofanya.

Roho Mtakatifu ni mmoja na Mungu Muumba, aliyeziumba mbingu na nchi kwa nguvu zake za uweza na kutawala historia ya wanadamu. Mungu amekuwa akiwalea watoto wake wa kweli kupitia Roho Mtakatifu. Basi, ufanye nini ili umsikie Roho Mtakatifu waziwazi na kufanikiwa katika kila jambo? Kwanza, ondoa kila aina ya uovu na utakaswe. Sauti ya Roho Mtakatifu haisikiki kwa masikio bali moyoni. Ukiacha kuomba, Roho Mtakatifu hukusihi moyoni usiache kuomba. Mwanzoni sauti yake huwa hafifu na isiyo wazi, lakini kila unapoitii, bila shaka itazidi kuwa wazi.

Unaweza kuisikia sauti yake kwa usahihi zaidi kadiri unavyoondoa dhambi na uovu na kuujenga moyo safi. Kwa hiyo, unapotekeleza Neno la Mungu na kuondoa dhambi zako kwa bidii, unaweza kuutakasa moyo wako, kuisikia sauti ya Roho Mtakatifu wazi zaidi na kupokea mwongozo wake. Pili, tii sauti ya Roho Mtakatifu bila kutegemea hali ulizo nazo. Waumini wengi wanataka kuitii sauti ya Roho Mtakatifu, lakini huitazama hali halisi na mazingira yao kisha hushindwa kumtii. Mungu anapowaambia wafanye jambo fulani, humwasi wakisema, “Sina nguvu ya kulifanya,” au, “Kwa hali ilivyo sasa si vizuri kwangu kulifanya.”

Yesu alisema katika Yohana 11:40, “Kama ukiamini utauona utukufu wa Mungu.” Mungu hufurahi na kukujibu unapomtii kwa imani bila kuangalia hali ulizo nazo. Ninaomba kila mmoja wenu amshukuru zaidi Mungu aliyemtuma Mwongozi katika safari ya maisha, aitakase mioyo yake kila siku ili aisikie sauti ya Roho Mtakatifu wazi zaidi, na amtii ili afanikiwe katika kila jambo. Ninaomba haya katika jina la Bwana wetu!