Heri 2
Kifungu cha Biblia: Mathayo 5:4
“4 Heri wenye huzuni, maana hao watafarijiwa.”
Leo ni mahubiri ya pili kuhusu Heri.
Juma lililopita tuliangalia Heri ya kwanza: Heri walio maskini wa roho, maana ufalme wa mbinguni ni wao. Tulieleza kwamba kuwa “maskini wa roho” hakumaanishi kukosa mali za dunia, kama utajiri au mamlaka. Watu waaminifu wa Biblia kama Abrahamu na Ayubu waliishi maisha yenye utele kwa sababu walipendwa na Mungu.
Yusufu aliuzwa utumwani katika nchi ya kigeni, na Danieli alichukuliwa mateka wa vita, lakini wote wawili walibarikiwa kufikia vyeo vikubwa na kupata utajiri katika nchi hizo. Tukiitafsiri “maskini wa roho” kihalisi, inaweza kuonekana kana kwamba watu hawa hawakuwa na baraka. Kwa hiyo ni muhimu kuelewa maneno haya kiroho. Kuwa maskini wa roho kiroho kunamaanisha kuwa na moyo mnyenyekevu usio na uovu wala tamaa za dunia.
Mtu wa namna hiyo anaweza kumwamini Mungu kwa urahisi na, kwa kutii Neno lake, kupokea baraka ya ufalme wa mbinguni. Hataokolewa na kuingia katika mbingu ya milele tu, bali pia atafurahia mamlaka na baraka za kiroho akiwa mtoto wa Mungu duniani.
